من الشاعر بدر الكبيح

صدوف الزمن تبري بالإدراك بري اقلام ،
الى ان تصاغر بعض الكبار في عيني ،

محتهم مثل ما تمحي التوبه الآثام ،
يا ربي تقوي فيني الوازع الديني !

قناعاتي بهالعام ماهي بمثل العام
من اغراني من العام ما عاد يغريني

لقيت الحياه دروس .. و لا الخيال اوهام ،
يسافر بي بكيفي و أحيان يغويني !

انا ودي ان الوقت بيدي مثل الافلام ،
اعيد الشريط بكل لحظه تسليني !

لكنه بدين اللي عن اللي خلق مانام ،
إله(ن) كتب الاقدار و الرزق بسنيني !

اذا مروا استبسال او مروا استرحام ،
اذا شاء يبلاني و اذا شاء ينجيني !

سجد وجهي لعزْته إذلال و استسلام ،
و لا غيره إليا ضقت أرفع له ايديني !

يا ربي وانا في وسط راسي كثير احلام ،
وانت الوحيد اللي عن الناس تغنيني !

و انا باذل الاسباب .. والله لو انها جرام ،
لو ان الهقاوي تصيب و احيان تخطيني !

بيمناي و عقالي و بشماغي البسام ،
سريت الدروب و طيب حظي يباريني !

و لا منةْ اللي لا انطلب كن عليه اعدام ،
تحق المنايا خير من منته فيني !

تغاضيت عن كل شي ما همني .. مادام
أميز محبيني و كاشف معاديني !

رفيقي ليا من ضاق قلبي كما الصمام
ينظم مرور الدم داخل شراييني !

و عدوي في بطنه غل كنّه حقل ألغام ،
جعل تقصر الخطوات مابينه و بيني !

نوايا قلوب الناس مثل البحر .. لطام ،
و لا داري بموجه على وين يرميني ؟

تمر المواقف عاتيه .. ما تمر انسام ،
عسى ربي يثبت على الارض رجليني !